[ندعوك للتسجيل في المنتدى أو التعريف بنفسك لمعاينة هذه الصورة]
[ندعوك للتسجيل في المنتدى أو التعريف بنفسك لمعاينة هذا الرابط]
هذي اول مرة اكتب موضوع في هالقسم
واول مرة في حياتي احاول اكتب رواية .... عشان كذا راح انزل القسم الاول من اول رواية و يمكن
آخر رواية أكتبها في حياتي
[ندعوك للتسجيل في المنتدى أو التعريف بنفسك لمعاينة هذه الصورة]
اذا حسيتوا انها حلوة ... شجعوني بردودكم و اذا مهي لهالدرجة لا تجاملون ابد بالعكس
قولوا وان راح انسحب وما راح اكمل الرواية و انا شاكرة لكم
[ندعوك للتسجيل في المنتدى أو التعريف بنفسك لمعاينة هذه الصورة]
بصراحة هي رواية قصيرة لأنها اول محاولة لي فما أعرف اسلوب المطمطة حق الروائين
أقروا هالقسم منها و عطوني رايكم
و مشكورين مقدماً سواء أعجبتكم الرواية أو ما أعجبتكم
وانا جداً جداً جداً سعيدة بمشاركتي هذي و اتمنى يكون وجودي خفيف على الجميع
و روايتي القصيرة بعد
تفضلوا هذي الرواية
[ندعوك للتسجيل في المنتدى أو التعريف بنفسك لمعاينة هذه الصورة]
((الجزء الاول))
كانت سيارة الجيب رنجـروفر تمشي بكل هدوء و تشق طريقها عبر الطريق الصحراوي و بداخلها الكل فرحان و مبسوط طبعاً
(ابو عبد العزيز) كان هو اللي ماسك السواقة و جنبه زوجته (ام عبد العزيز) و وراهم كانت ( رواء ) بنتهم الكبيرة
تقرى في كتاب يتكلم عن الفنون التشكيلية لأنها تمل من المشاوير الطويلة فأخذت كتاب عشان تتسلى به لحد ما
يوصولون (رواء) عمرها 23 سنة خريجة فنون جميلة.. هادية و خلوقة و قادرة على تحمل المسئولية اللي يشوفها بالبداية
يقول عنها مغرورة لقلة كلامها وفي الحقيقة هي تحب تسمع اكثر مما انها تتكلم تحب تفهم شخصيات الناس اللي حولها
قبل لا تبدأ بالتعامل معهم
جنبها كان جالسة اختها ( روان ) و روان طبعاً اصغر من رواء بخمس سنوات كانت في ثاني ثانوي و في سن المراهقة عشان كذا
ابلشت ابوها طول الطريق وهي تسأل ( يبه كم باقي و نوصل ) او ( يمه كم باقي و نوصل ) او ( اف انا مليت )
روان كانت النقيض لرواء كانت مرجوجة و خرشة شخصية مرحة تنحب تجمع بين البراءة و الذكاء و اللباقة اما رواء
فكانت عاقلة لكنها تموووووووووت في رجة اختها و خرشتها...
و اخيراً عزوز كان عمره ثلاث سنوات و كان شوي يقعد بحضن امه و شوي يرجع عند اخواته ورى .. طبعاً عزوز
ماهو شقيق لرواء و روان كان اخوهم من ابوهم لأن امهم توفت بعد معانة مع الفشل الكلوي و ام عبد العزيز
تكون خالتهم اخت امهم تزوجها ابوهم بعد الحاح من رواء و روان لانهم كانوا يموتون بخالتهم وهي كانت تعشقهم لأنهم
موبس بنات اختها .. لانهم بنات اختها الوحيدة و التوأم لها فكان فقدها شي مهو هين عليها وربي عوضهم و عوضها بهم
وفعلاً تزوج أبوهم بخالتهم و ألتم شمل الاسرة مرة ثانية ...و أبو عبد العزيز حس ان ربي رجع له زوجته لأن
أم عبد العزيز كانت تشبه أختها الله يرحمها تماماً نفس الشكل نفس الجسم نفس الصوت نفس الاخلاق... و كانت سعادته كبيرة بها
تقدرون تقول هالعائلة اسعد عائلة في الدنيا كلها .. ابوعبد العزيز رجل اعمال ناجح و عقل مفكر و مدبر... كان
يملك ثروة يحسده عليها الجميع ... و رغم كذا كان قمة في التواضع...
وصلت العائلة للمكان اللي كانوا ناويين يقضون فيه يوم الجمعة ابو عبد العزيز معود العائلة يوم الجمعة مخصص لكشته بريه عائلية
وقفت السيارة و بصوت عالي : وصلنااااااااااااااااااااااااااااااااااااااااا يا روااااااااااااااااان
ام عبد العزيز: الحمدلله على السلامة
روان : اخيراً ما بغينا نوصل
روان فتحت الباب بسرررررررعة و وقفت و قامت تتمغط وهي تقول: اعوذ بالله احس عظامي تعورني من كثر القعدة
رواء: روان خلي الهياط عنك ما طولنا كلها ساعة وحدة
روان : انتي تعرفيني انا ما احب قعدت السيارة تتعبني
ام عبد العزيز : يا بنات خلو السوالف عنكم و تعالوا ساعدوني انا و ابوكم
رواء و روان : سمي... ان شاء الله يمه
كانوا ما ينادون خالتهم إلا يمه وهي بالنسبة لهم أمهم صدق
ابو عبد العزيز جهز أغراض الشوي و شب النار و حط الدجاج في اسياخ و حطها على النار..
رواء و روان فرشوا فرشتهم و حطوا المتاكي عليها و ام عبد العزيز نزلت القهوة و الشاهي و المكسرات و الحلا
ابو عبد العزيز وهو يجلس جنب ام عبد العزيز على الفرشة: اقول يا ام عبد العزيز قولي آمين
ام عبد العزيز : آمين
ابو عبد العزيز : و انتم يا بنات قولوا آمين
رواء و روان بصوت واحد : آمييييييييييييييييييييييييييين
ابو عبد العزيز : عسى الله لا يفرق هالجمعة بشر....و يخليكم لي
ام عبد العزيز و رواء و روان : آمييييييييييييييييييين
عزوز وهو ما يدري وش السالفة: آمين آمين آمين آمين
الباقين :هههههههههههههههه
روان : علق الأخو وش يفصله ألحين
------------------------------------------
كملت العائلة جلستها بضحك و سوالف و وناسة و تغدوا دجاج مشوي وقعدوا يقرون نكت من جوالاتهم بعدين حطوا الجوالات و قاموا يلعبون كورة
و عزوز معهم
وفجأة هبت عاصفة الهوى من كل مكان و الغبار
أبو عبد العزيز: بسرعة بسرعة اركبوا السيارة
ام عبد العزيز : يللا خلنا نشيل الاغراض بسرعة
أبو عبد العزيز : خلو كل شي و اركبوا السيارة بسرعة
الجو صار يخوف السماء فجأة صار لونها اسود و تلبدت بالغيوم .... صوت الرعد و الصواعق صار قوي
الغبار كل ماله يزيد في الجو حتى في الاخير انعدمت الرؤية نهائياً
ابو عبد العزيز كان يحاول يطلع من المنطقة اللي هم فيها لكن للأسف تاه في وسط الغبار و ما عاد يدري هو في اي اتجاه ما يشوف قدامه غير الغبار
روان وهي تبكي : يبه وش فيه انا خايفة
ابو عبد العزيز : لا تخافين وانا ابوك ان شاء الله الغبار بيخف و نشوف الطريق
ام عبد العزيز : بنات استغفروا و ادعوا ربي يزيح هالكربة عنا
رواء : يارب ... و قعدت تستغفر
المطر بدا ينزل .........
أبو عبد العزيز : الحمدلله المطر نزل يعني الغبار بإذن الله راح يروح يللا يا ام عبد العزيز و انتم يا بناتي اضحكوا..
ام عبد العزيز: ياربي لك الحمد و الشكر
روان و هي تمسح دموعها و تضحك : الحمدلله يا ربي ... الحمد لله
رواء: الحمدلله
رواء كانت خايفة بس كانت متماسكة ما تبي ابوها يتوتر أكثر ...كانت حاسة ان ابوها خايف عليهم ..
الغبار خف و المطر ينزل بغزارة ...
بدت السيارة تتحرك من جديد و الرؤية وضحت.. لكن المشكلة ان ابو عبد العزيز ضيع طريقه
قعد يلف و يدور يبغى يشوف المكان اللي دخلوا معه لكن لا حياة لمن تنادي ما يشوف إلا صحراء و تراب بس
روان : يبه ما اذكر اننا مرينا هالمكان من قبل
ابو عبد العزيز: .................................
ام عبد العزيز: هدي اعصابك يا ابو عبد العزيز لا تتوتر مهو صاير إلا كل خير.....
رواء: روان ابوي اذا سمع نكتك يضحك و ينبسط سمعينا نكته عشان نروق الوالد و الوالدة
رواء طبعاً تبي تخفف التوتر اللي بدى يرجع للكل كانت تبي تشغل تفكير روان و تبغى تحسس ابوها انهم عادي و ماهم خايفين
روان : اممممممممممممممممممممممممممم
رواء : وش فيك فقدتي الذاكرة ولا نسيتي النكت....
روان: ................ اي ذكرت ...
ام عبد العزيز : أخيراً
روان : في بخيل ....................
سكتت روان لأن صاعقة قوية ضربت و فجأة المطر زاد و نزل بشكل مهو طبيعي ... عزوز بدى يبكي ام عبد العزيز ضمت ولدها
ابو عبد العزيز مهو قادر يتصرف يبغى يطلع من هالمكان بس مهو عارف شلون يطلع
رواء ميتة من الخوف بس ماهي مبينه
روان قافلة يدها وحاطتها على فمها و تعض اصابعها من الخوف و دموعها ما وقفت
فجأة السيارة وقفت و طفى كل شي فيها
روان : يبه وش فيها وش صار
ابو عبد العزيز :...............................................
ام عبد العزيز : ابو عبد العزيز وش فيه ...؟ ..... وحطت يدها على كتف زوجها
ابو عبد العزيز التفت و بصوت عالي : خلاص اسكتوا ما ابي اسمع ولا كلمة
الوضع في السيارة صار رعب بمعنى الكلمة .....موية المطر وصلت لنص باب السيارة..... و الكل ساكت
رواء: يبه طيب كلم امن الطرق خلهم يجون ...
ابو عبد العزيز و وجهة استبشر و كأنك عطيتيه مليون ريال
ابو عبد العزيز : صادقة يا بنتي شلون فاتتني هذي
ام عبد العزيز : انا ما فاتتني...
الكل طالع ام عبد العزيز باستغراب
ابو عبد العزيز : وش قصدك ....؟
ام عبد العزيز : كلنا طلعنا جوالاتنا و حنا جالسين و قعدنا نقرى نكت و تركناها على الفرشة و رحنا نلعب كورة وبعدين انت قلت اركبوا و خلو كل شي
ما معنا ألحين ولا جوال
ابو عبد العزيز ضرب الدركسون بأقوى ما عنده .....
روان: لا لا انا جوالي معاي كنت ألعب بلعبة عندي فيه لما بدا الغبار
ابو عبد العزيز : وينه وانا ابوك عطيني اياه بسرعة
روان طلعت جوالها و عطته ابوها ويدها ترتجف..... و اتصل ابو عبدالعزيز على امن الطرق
ابو عبد العزيز : السلام عليكم
موظف امن الطرق : وعليكم السلام
ابوعبد العزيز : اخوي حنا طالعين للبر و الغبار جانا و تهنا في البر و محنا عارفين نطلع و سيارتنا طفت و المطر غزير بدى يوصل درايش السيارة
موظف امن الطرق: اخوي حدد لي مك..................
و فرغت بطارية الجوال لحد هنا...روان كانت تلعب و لما شافت الغبار و المطر خافت و نست تقفل اللعبة فكانت اللعبة مفتوحة و تسحب بطارية
طول الوقت
ابو عبد العزيز: البطارية خلصت
ام عبد العزيز: طيب ما معك شاحن سيارة
ابو عبد العزيز: إلا معي بس السيارة طافية... روان و انا ابوك ما معك بطارية ثانية
روان : لا ما معي...
وجه ابو عبد العزيز صارت اسود من زود الهم ...رواء تطالع برى شباك السيارة و ميته رعب الموية وصلت للشباك
ابو عبد العزيز فتح باب السيارة و اخذ عبد العزيز من امه و رفعه فوق السيارة
ابو عبد العزيز: يللا كلكم اطلعوا فوق السيارة
ام عبد العزيز مسكت يد زوجها و سحبها و رفعها فوق السيارة رواء مسكت ابوها و رقت مع امها و اخوها و روان نفس الشي
بعدين ابوهم جا معهم
عبد العزيز كان صغير و يبكي و امه تضمه و تحاول تسكته.... رواء تبكي ما عاد تقدر تخفي خوفها اكثر
ابو عبد العزيز التفت عليهم و قال: تعرفون تسبحون .........؟
ام عبد العزيز صُعقت لما سمعت هالشي و قالت : لا انا ما اعرف....؟
روان : ولا انا ما اعرف.......؟
رواء تعرف بس وش الفايدة اهلها كلهم ما يعرفون عشان كذا قالت : حتى انا ما اعرف...
انهار ابو عبد العزيز وحط يدينه فوق راسه و حس انه ما قدامه الا انه يدعي رب العالمين ينجيهم من هالكارثة.......
((الجزء الثاني))
رواء....... يا رواء....... ما تسمعين عمى بعينك وش قاعدة تسوين
مسحت رواء دموعها اللي تنزل كل ما تذكرت الحادث اللي بسببه فقدت ابوها و خالتها و اختها و اخوها ....
رواء: ان شاء الله جاية
سحر: وش قاعدة تسوين ليش ما تردين ما تسمعين امي لها ساعة تنادي
رواء : ان شاء الله هذا أنا جاية بس كنت اكمل غسيل صحون الغداء...
سحر: بسرعة يللا خلك ما تروحين لأمي بسرعة وشوفي وش يصيرلك
سحر بنت عم رواء عمرها 22 سنة تكره رواء كره الموت لأنهم كانوا أغنى منهم و هم متوسطين الحال و طبعاً لان بعد وفاة ابوها و اخوها عمها
هو اللي ورث ثروة ابوها طبعاً كان عمها ضعيف شخصية قدام زوجته عشان كذا ما خلاها تاخذ من ثروة ابوها شي ....
بالعكس جابها بيته و خلاها تخدم زوجته و بنته ...و كان ما عنده الا سحر لان زوجته تعاني من مشاكل في الحمل و حملت بسحر بصعوبة
عشان كذا سحر هي دلوعة امها و ابوها و جاء الدلع هذا على حساب راحة المسكينة رواء
سحر تكره رواء لأنها على انها اكبر منها بالعمر إلا أنها اصغر منها بالشكل رواء اللي يشوفها يعطيها في 18 او 19 سنة
اما سحر فشكلها يعطي اكبر من عمرها ..
و رواء كانت جميلة مرة على انه اقل من اختها روان الله يرحمها بالجمال بكثير..
بس اذا سويتي مقارنة بين رواء و سحر أكيد في المقارنة ظلم لرواء لأن سحر ابد ما كانت جميلة كانت اقل من عادية
حتى الجيران لما يجون يزورون بيت ابو سحر وشافوا رواء يقولون ان شكلها اقل من عمرها
وانها عكس سحر تماماً
و هذا اللي زود الكره في نفس سحر على رواء و صارت مو بس تكرها تحقد عليها و تتمنى لها الشر....
فجأة سمعت رواء صوت صراخ و زعاق و راحت تركض لمكان الصوت
شافت سحر واقفة تصارخ وهي تناظر رواء وفي وجهها ضحكة شر و جلست على الارض و حاست شعرها و مسكت يدين رواء و حطتها على راسها
حاولت رواء تبعد عن سحر لكن سحر كان اقوى منها و اكبر منها حجم
جاء ابو سحر و زوجته على صوت صراخ سحر و شافوا الموقف... سحر في الارض وهي تصارخ و رواء ماسكه شعرها
صرخ العم بأعلى صوته : رواء وش قاعدة تسوين
رواء وهي تبكي : والله يا عمي ما سويت شي و الله يا عمي ما لمستها
ام سحر: و تكذبين بعد تكذبين و حنا نشوفك قدام عيونا طاحية طق بسحر
رواء : صدقوني ما جيتها هي تمثل تكذب عليكم
في اللحظة ما حست رواء إلا بكف قوووي جاها على وجهها من عمها....
العم : اذا مديتي يدك على بنتي مرة ثانية راح يكون آخر يوم في حياتك ...فاهمة...
رواء وهي تحس بأقسى معاني الظلم : فاهمة....
ام سحر : انت ضربتها بس انا لألحين ما عاقبتها على اللي سوته في بنتي
مسكت ام سحر رواء من يدها و رقت بها فوق للسطح كان فيه غرفة فوق مهجورة بحمامها دخلت رواء فيها
ام سحر: خليك هنا لحد ما تعرفين غلطتك
رواء : تكفين يا خالتي خلاص و الله ما عاد أقرب جنب سحر تكفين
وقربت منها تبي تبوس يدها
ام سحر: ابعدي عني توك ما شفتي شي هالمرة والله ان تخيسين في هالغرفة
رواء كانت تخاف من هالغرفة لأنها مهجورة و مليانة فيران و حشرات و بالليل ظلام ما فيها نور ما تقدر تشوف الحشرات و تبعد عنها
وجلست رواء تبكي طول و تدعي ربها يفكها من يدين عمها و زوجته.....
جاء الليل وبدى الجو يبرد رواء في الغرفة اللي في السطح مافي دفاية ولا حتى نار كانت تحس بالبرد يسري في كل جسمها
وفجأة حسب بحركة تفتح الباب انبسطت لأنها تحسب عمها أو زوجته رحموها و جو يطلعونها
بس المفاجأة انها كانت سحر ... ناظرت في رواء بكل استحقار و هي تقولها:
اكرهك تعرفين وشلون أكرهك ..... اكرهك من كل قلبي و ماراح اخليك تتهنين في حياتك أبد
رواء: سحر حرام عليك والله عمري ما سويت لك شي
سحر: ما سويتي شي...؟ انتي من دخلتي هالبيت و انا ما عرفت السعادة
الكل يقول رواء أحلى منك رواء أحلى منك
وفي الاخير ولد جيرانا اللي طول عمري احلم فيها و ابيه .. تجي امه تخطبك له و انا قدامها سنين ما عبرتني ولا فكرت فيني
رواء: طيب انا وش ذنبي انا اللي قلتلها تعالي اخطبيني
سحر: ذنبك انك حلوة و راح تشوفين شلون راح اخليك ابشع وحدة بالدنيا
كان مع سحر في يدها برميل فيه شي سايل رواء يوم شافته خافت ان سحر تبي تحرقها و هذا البنزين
قامت سحر و كبت اللي في البرميل كله على راس رواء بسرعة
كان البرميل فيه موية باااااااااااااااااااااااردة و لما نزلت الموية على راس رواء اللي اصلاً كانت بتتجمد من البرد
و مع خوفها انه يكون بنزين و سحر تبي تحرقها به ... أغمي على رواء و فقدت الاحساس بكل شي
************************************************** ********
في المستشفى كان ابو سحر ينتظر الدكتورة تطلع من الغرفة اللي فيها رواء و في نفس الوقت خايف لا يكون صار بالبنت شي
لأن سحر بعد ما أغمي على رواء خافت مرة ونزلت لهم ركض وهي تصيح وتقول رواء ماتت انا قتلت رواء
كان خايف ان سحر تتورط في موتها اكثر من خوفه على ان بنت اخوه تموت..
طلعت الدكتورة من عند رواء وعلى طول سألها
ابو سحر: طمنيني يا دكتورة شلونها
الدكتورة: انت وش تصير لها
ابو سحر : انا عمها و ولي امرها بعد وفاة ابوها
الدكتورة : الحمدلله هي بخير بس يمكن البرد اثر عليها شوي
ابو سحر: يعني اقدر اخذها معي يا دكتورة للبيت
الدكتورة : لا اليوم لا بكرة ان شاء الله تاخذها لأنها محتاجة لشوي مغذيات
ابو سحر : مشكورة يا دكتورة
الدكتورة : العفو لا شكر على واجب
---------------------------------------
في بيت العم كانت ام سحر و سحر ميتين من الخوف و رايحين جايين عند الباب لان ابو سحر ناسي جواله بالبيت مع الربكة اللي صارت وهو ينقل رواء للمستشفى
ام سحر : ألحين انا قافلة عليها بالسطح ليش تطلعين لها
سحر : كنت بأكب عليها الموية مثل ما ضربتني اليوم وقطعت شعري
ام سحر قربت من سحر وقالت : انتي تحسبين ان حركتك اليوم انا مصدقتها.... تحسبيني صدقت انها كانت تطقك و تجر شعرك..
انا بس جاريتك عشان ما اطلعك كذابة عند أبوك ولا انا شايفتك و انتي تمسكين يدها و تحطينها على شعرك ...
سحر : يمه والله مهو بيدي أكرها و لا أبيها تقعد في بيتنا بعد.....
ام سحر و عيونها كلها شر : حتى انا مليت منها في بيتي و أبغى اطلعها منه..
في هاللحظة دخل ابو سحر للبيت و هو تعبان و وجهه اصفر من الروعة
ام سحر و سحر: ها بشر وش صار.....؟
ابو سحر: الحمدلله الدكتورة تقول انها بخير
ابو سحر : الدكتورة قالت لازم تقعد عندهم الليلة عشانها محتاجه للمغذي
التفت ابو سحر لسحر و ناظرها بعين قوية و قال
ابو سحر: انتي وش سويتي بالبنت ...؟
سحر خافت وراحت توزت ورى امها ... قربت ام سحر منه و قالت
ام سحر : يعني وش بتسوي بنتي مهي مسوية شي بالعكس زين اللي رقت لها و شافتها وهي مغمى عليها ولا كان لألحين ما ندري عن البنت
ابو سحر : اجل وراها تقول انا قتلت رواء
ام سحر : لاني قفلت عليها غرفة السطح بسبب سحر لانها طقتها
ابو سحر : خير ان شاء الله
سحر حمدت ربها ان امها خلصتها من هالموقف ولا كان ذبحها ابوها لانها بغت تجيب له مصيبة و اول ما دخل ابوها غرفتها ضمت امها وقالت لها
سحر: يمه انتي احسن أم في الدنيا أحبـــــــــــــــــــــــك
ام سحر: وانا بعد احبك يا بنتي بس انتبهي مهو كل مرة تسلم الجرة
سحر : ان شاء الله يمه بس تكفين خليها تطلع من بيتنا ما جانا منها الا المشاكل و المصايب
ام سحر: لا تخافين يا بنتي طلعت رواء من البيت ان شاء الله بتكون على يدي انا
**********************************
(( الجزء الثالث))
طلعت رواء من المستشفى و راحت بيت عمها و رجعت سحر تعامل رواء المعاملة نفسها و ما خافت من اللي صار اول لها
وكانت تتعمد تأذيها في كل شي .. و تحرض امها و ابوها عليها
وفي يوم من الايام دخل عليهم ابوسحر وهو مهموم وسرحان و مبين ان فيه مصيبة على راسه
ام سحر: ابو سحر عسى ما شر وش فيك....؟
ابو سحر: .........................................
ام سحر : ابو سحر وش فيك ليش ما تجاوبني.....؟
ابو سحر:............................................
ام سحر بصوت عالي : اذا تحسبني بسكوتك هذا بأقوم و أخليك فأنت غلطان..
ابو سحر و لأنه ضعيف شخصية قدام زوجته : مصيبة .... مصيبة....؟
ام سحر: وش المصيبة وش فيه وش صار....؟
ابو سحر: كل مالي و حلالي اللي ورثته من اخوي ضااااااااااااااااااااااع
ام سحر في حالة ذهول و صدمة قالت
ام سحر : شلون ضاع هذي ملايين شلون تضيع.....؟
ابو سحر: وانتي الصادقة مليار......؟
ام سحر: وشو مليار.....؟
ابو سحر : ايه انا ورثت من اخوي مليار.....
ام سحر: مليار و تكذب علي تقول 500 مليون .... وين راحت هالفلوس كلها فإيش ضاعت علمني ؟؟؟ عسى منت تلعب قمار...؟
ابو سحر:ضاعت في الأسهم
ام سحر:وانت حطيت فلوس الورث كلها في الأسهم...؟
ابو سحر: ايه حطيتها كلها كنت ابي اكبر ربح و بسرعة...
ام سحر : حسبي الله عليك انا ماقلتلك لا تحط الفلوس كلها في الاسهم وش بنسوي ألحين علمني ...
ابو سحر : مادري مصيبة....؟
وقفت ام سحر قدام ابو سحر و الشر و الغضب كله في عيونها وقالت
ام سحر: اسمع انا اول مستحملتك عشان الفلوس اللي ورثتها من اخوك لكن كون اني ارجع للفقر اللي كنت معيشني فيه انسى
انا استحملتك انت و بنت اخوك عشان هالفلوس غيره والله ماراح اقعد دقيقة في هالبيت اذا ما طلعت بنت اخوك منه ورجعت الفلوس ...
-----------------------------
رواء سمعت كل شي لان عمها و زوجته كانوا في الصالة وهي في المطبخ وصوتهم كان عالي وصل لها
خافت لان زوجة عمها كانت ساكته عنها عشان الفلوس اللي ورثوها من ابوها و عشان ما تطالب بحصتها من الورث
بس ألحين لا فيه فلوس ولا ورث...
ياربي وش بتسوين ألحين يا رواء<<< قالته رواء في نفسها
يا ترى وش بيسوي عمي و زوجته فيني ألحين وين بأروح انا مالي احد غيرهم الله يعين ... وجلست تبكي
--------------------------------------------
مانامت رواء طول الليل كانت تصلي و تبكي و تدعي ربها انه يفرج كربها و همها و انه يكفيها شر عمها و زوجته و بنته
وجلست تتذكر ابوها و حنانه عليها .. و أمها و اختها و خالتها و عزوز اخوها اللي كانت تموت فيه ..
و ماتت من الكباء و تمنت انها ماتت معهم ولا عاشت هالعذاب اللي هي فيه..... بعدين رجعت استغفرت ربها و حمدته
في الصباح نزلت ام سحر للمطبخ و لقت رواء قاعدة تحضر الفطور و الحليب الدافي.....
ناظرتها بتكشيره و قالت
ام سحر : بسرعة جيبي الفطور و حطي في بالك انك ماراح تطولين هنا......
رواء : ان شاء الله
رواء ميته من الخوف و ما بيدها حلية بس كانت طول اليوم تستغفر و تكثر من الاستغفار......
حطت الفطور لعمها و زوجته على طاولة الطعام و قعدوا يفطرون ولما جت ترجع للمطبخ قالهاعمها
ابو سحر: الساعة 10 تكون القهوة و الشاهي جاهزين بيجيني رجال
رواء : ان شاء الله.... و دخلت للمطبخ
ام سحر قربت راسها لابو سحر وقالت : منهم الرجال اللي بيجونك عالصبح كذا....؟
ابو سحر : مدري دق علي الصبح واحد يقول اسمه راشد و يقول أنه يبي يجي الساعة 10 عشان يكلمني عن موضوع الأسهم.....
ام سحر و في فمها ضحكة عريضة : يعني يبون يعوضونك عن الخسارة...؟؟؟
ابو سحر : انا فهمت من كلامه انه شي زي كذا .... عشان كذا رحبت به و قلت حياك الله وعطيته عنوان البيت
ام سحر وهي تتعدل على الكرسي زين و تبعد وجهها عن ابو سحر: اي والله حياه الله ..... يا روااااااااااااااااااء
رواء وهي جاية تركض و خايفة من المطبخ : سمي....
ام سحر : اسمعي طلعي طقم الفناجيل و البيالات الكرستال الجديد اللي توني شاريته و دلة القهوة الجديدة وترامس الشاي و النعناع
وسوي تمر محشي باللوز و البسكوت و تمر بالسمسم و تمر بالفستق و حطيهم لضيوف عمك اذا وصلوا
رواء : ان شاء الله
ام سحر : و قومي ألحين نظفي مجلس الرجال و بخريه و طلعي المدخنة الجديدة عشان نبخر ضيوف عمك لين جو بيطلعون
رواء : ان شاء الله
-------------------------------------
الساعة عشر الا عشر دقايق كان كل شي مجهز المجلس مبخر و مرتب و القهوة و اصناف التمر و الشاي و النعناع على الطاولة
و طقم البيالات و الفناجيل اللي ما تطلعه ام سحر إلا للضيوف المهمين جنب الشاي و القهوة عالطاولة
ابو سحر يدخل المجلس عند رواء و يقول
ابو سحر : ها .. عسى كل شي جاهز
رواء : كل شي يا عمي مثل ما طلبته جاهز
ابو سحر : يللا اجل اطلعي من المجلس قبل يجون الرجال
طبعاً رواء عمرها ما انتظرت من عمها كلمة شكراً او جزاك الله خير او يعطيك العافية لانها ما تعودتها منه
طلعت رواء من المجلس و في طريقها قابلت ام سحر
ام سحر : خلصتي جهزتي كل شي
رواء : ايه
ام سحر: يللا اجل روحي للمطبخ طلعي اغراض الغداء و قطعي الخضار و الدجاج سحر اليوم تبي على الغداء مقلوبة خضار بالدجاج
رواء : ان شاء الله
ام سحر : وسوي بعد سلطة سيزر سحر مشتهيتها
رواء : ان شاء الله بس ممكن أفطر لأني لألحين ما أفطرت
ام سحر : افطري عساه ما ينزل بس لا تطولين بسرعة عشان الغداء ابيه جاهز الساعة 12 على قومة سحر من النوم
رواء: ان شاء الله
كانت رواء بنت راقية في اسلوبها عمرها ما حاولت تعامل اللي قبالها مثل ما يعاملها و كانت دايم تذكر كلمة ابوها
(( يا بنتي كل إنسان يتصرف بتربيته))
عشان كذا عمرها ما حاولت تسيء لأحد عشان ماحد ياخذ فكرة ان تربيتها ما كانت سليمة .....
دخلت المطبخ و سوت لها ساندوتش جبنة بيضاء مع طماط و كاس شاي و تذكرت اختها روان لأنها كانت تمووووووت بالجبن الابيض الحامض
كانت رواء ما تحبه و روان دايم تطلبها انها تعطيها نصيبها عشان تاكله و كانت رواء تعطيها بس من ماتت اختها وهي صارت تحب الجبن الابيض
و اكلت الساندوتش وهي تقول ( حبيته لعيونك يا روان الله يرحمك )
--------------------------------------------------------------------------------------------------------------------------------------------
راشد : الله يحييك و يبقيك
ابوسحر : تفضل ... تفضل
راشد : دام فضلك
دخل راشد المجلس و كان في الخمسينات من العمر لكن صحته كانت ممتازة مبين انه كان يهتم بها و كان له هيبة و حضور قوي
لما دخل المجلس حس ابو سحر ان الرجالهذا مهو اي رجال حس انه من هوامير السوق او وزير بس استغرب
وش السبب اللي جابه لبيته و من اللي عطاه رقم تليفونه
-------------------------------------------
في هاللحظة كانت ام سحر و سحر واقفين عند الشباك اللي يطل على حوش الرجال و شافوا راشد وهو يدخل المجلس
سحر: يووووووووووه يمه هذا شايب وش يبي من ابوي
ام سحر : صدقتي يمه شايب بس شوفي الفلوس وش تسوي
سحر : اي والله يمه بصراحة شكله رززززززززه ... انا اتوقع عنده خدم يلبسونه و يغسلون يدينه و رجوله
ام سحر : والله وانا امك كل شي جايز
سحر: وش تتوقعين يبي من ابوي يمه
ام سحر : والله مدري وانا امك بس على كلام ابوك احتمال انه يبي يعوضه عن خسارته بالأسهم
سحر: شلون يعوضه يمه .... ليش هو يقرب له...؟
ام سحر: لا يمه أول مرة يسمع باسمه ابوك او يشوفه......
سحر: اجل وش السالفة يمه اكيد فيه سر
ام سحر: شوي و يطلع من عند ابوك و ابوك يعلمنا كل شي..
رواء كانت في المطبخ ولا تدري عن شي و كل اللي تفكر فيه كلمة مرت عمها لما قالت لها حطي في بالك انك منتي مطولة هنا
يا ترى وش مصيري لما يطردني عمي من بيته أكيد مرت عمي ماراح ترحمني ما دام الفلوس
اللي كانت طمعانه فيها راحت
رواء خايفة من المجهول و ما تدري وش اللي بيواجها
********************************************
طلع راشد من عند ابو سحر و سحر و امها عند الدريشة يتفرجون على المنظر وشافوا رجال لابس ثوب و شماغ يفتح باب السيارة المرسيدس بانوراما لراشد عشان يركب وركب هو مكان السايق و مشت السيارة
بس وجه ابو سحر متغير و ما يبشر بالخير ابد
اول ما دخل ابوسحر الصالة راحو له ام سحر و سحر وهم يركضون
ام سحر: ها ... وش يبي منك الرجال
ابو سحر: الظاهر ان المصايب تجي ورى بعض
سحر : ليش يبه وش يبي هالرجال منك
ابو سحر: يقول ان اخوي كان متسلف منه فلوس و انه سافر برى الديرة و توه ألحين يرجع و درى بوفاة اخوي وجاي يطالب بفلوسه
ام سحر : و كم هي فلوسه.....؟
ابو سحر : يقول 5 مليون
ام سحر: حسبي الله عليك و على اخوك وعلى بنته
ابو سحر : يا حرمه ما يجوز اخوي ميت
ام سحر : بلا ميت بلا حي .. وش جانا من وراك و وراه و ورى بنته غير المشاكل و البلاوي
ألحين وش بتسوي
ابو سحر : اصبري يا حرمه و ألحقيني للغرفة
رواء وقف الدم في عروقها سمعت كل شي و عرفت ان الطين زاد بله وش تسوي فكرت انها تهرب من بيت عمها لأن مرت عمها أكيد بتذبحها
بس رجعت تراجعت قالت خير يا رواء شكلك عايشة جو افلام الاكشن تهربين وين تروحين له مصيرك بترجعين و ساعته محد يلومهم فيك
ياربي بس انا خايفة والله ماراح تخليني مرت عمي بحالي
هالمرة اكيد بتدور مكان غير غرفة السطح.. يمكن تعذبني ياربي معقولة تحرقني مرة ثانية لا مابي
ودخلت رواء في حالة رعب و صارت يدها ترتجف وهي تقطع السلطة و ما تسمع بأذنها غير دقات قلبها اللي صارت سريعة و علت على كل شي
ولا تدري وش بيصير لها اليوم اكيد راح يصير شي كبير من غضب ام سحر بس ما تدري ايش هو
دخل ابو سحر غرفته و دخلت ام سحر وراه
ابو سحر : سكري الباب زين و تعالي هنا جنبي
ام سحر : طيب
سكرت الباب بسرعة وراحت ركض و جلست جنب ابو سحر
ام سحر : ها ... وش فيك عطني اللي عندك بسرعة ولا تحرق اعصاب اكثر
ابو سحر : الرجال ما قالي ابي فلوس وبس
ام سحر : اجل وش يبي بعد وش اخذ منه اخوك بعد...؟
ابو سحر: يا حرمه اصبري علي وش فيك عجلة...
ام سحر : يللا قول عطني اللي عندك ... ترى ما عاد فيني صبر
ابو سحر: قال انه يبي يتزوج سحر
ام سحر : وشو...قالك زوجني سحر؟
ابو سحر: لا ما قال كذا.... قال اذا ما تقدر تسدد دين اخوك زوجني وحدة من بناتك...
ام سحر و الضحكة على وجهها : بــــــــــــــــــس
ابو سحر : وشو اللي بس......؟ اقولك يبي يتزوج بنتي....؟
ام سحر : بس هو ما قال زوجني سحر......
ابو سحر : وش قصدك.........؟
ام سحر وهي تضحك لان الطريقة اللي تتخلص بها من رواء جتها على طبق من ذهب قالت
: اخوك هو اللي تسلف منه ليش انت اللي تزوجه بنتك زوجه بنت أخوك...........
ابو سحر : بس يا أم سحر هذا شايب رجله و القبر
ام سحر : احسن عشان يموت و تورثه بنت اخوك
ابو سحر وهو يبتسم : اما انتي عليك عقل داهية يلوموني في حبك واني دايم اسمع شورك...
ام سحر : شفت شلون عشان تعرف ان عندك حرمه ما مثلها...
ابو سحر : طيب ليش ما ازوجه سحر عشان تورثه احسن من رواء...
ام سحر : نعم حبيبي و بنتي تصير أرمله لا يا قلبي بنت اخوك تصير ارمله و تاخذ انت ورثها من زوجها مثل ما اخذت ورثها من ابوها
وتصير كسبت ورثين بدل ورث واحد و ابو راشد شكله ثقيل و فلوسه واجد...
ابو سحر : يا عيني عليك يا زوجتي و الله انك روعة
ام سحر : مشكور يا زوجي
وناظروا بعض وهم يضحكون ضحكة كلها مكر و نذالة
-----------------------------------------------------------
في المطبخ طاح الصحن من يد رواء و تكسر وهي تسمع صوت ام سحر تناديها
قامت تقول في نفسها (( ربي اكفنيها بما شئت و انت السميع العليم )) و ترددها كذا مرة ....
دخلت ام سحر على رواء و هي في هالحالة و شافت الصحت مكسور..... رواء عرفت انه جاء الوقت اللي كانت خايفة منه و بدون شعور جلست تبكي
رواء: والله يا مرت عمي لأعيش طول عمري خدامة لكم ولو تبين أنام كل ليلة في غرفة السطح بس تكفين لا ترميني في الشارع
ام سحر جت جنب رواء و اخذت السكين من يدها وهي تضحك بوجهها
رواء كل خلية في جسمها ترتعش من الخوف ولما شافت السكين في يد زوجة عمها و هي تضحك و جنبها غابت عن و عيها و ما عاد تحس بشي حولها
------------------------------------------------------
رواء يا رواء اصحي افتحي عيونك....
فتحت رواء عيونها وشافت عمها جالس جنبها و زوجته...
رواء وهي تبكي و تبوس يد عمها : عمي والله ماراح اسوي شوي بس تكفون لا تذبحوني
ام سحر: وش بك انتي يالخبلة من هو اللي يبي يذبحك,,,,؟
رواء وهي منهارة تبكي : انتي يا مرت عمي...
ام سحر و ابو سحر يضحكون
ابو سحر : لا وانا عمك ما راح نذبحك ولا شي...
ام سحر: انا كنت داخله عليك ابشرك...
رواء : بإيش تبشريني.....؟
كانت عارفة ان فيه مصيبة تستناها لان عمها وزوجته مستحيل يجيها منهم شى حلو......
ابو سحر : جايك خطيب يا بنت اخوي
[/size]